Agtergrond/Background
COMPUTUS BESTUURSBURO, BK het op 1 September 1991 as 'n burodiens in die Oos-Vrystaat begin funksioneer om spesifiek boere se finansiële rekordhouding te behartig. Op daardie stadium het die burodiens uit een landbou-ekonoom en vyf boere bestaan. Mettertyd het nog vyf landbou-ekonome en meer as honderd boere by COMPUTUS aangesluit. In 1999 het COMPUTUS ook die burodiens van Sentraal-Oos Koöperasie oorgeneem toe dié deur OTK oorgeneem is. Die burodiens beskik tans oor 'n wye verskeidenheid ervaring en kundigheid rakende boerderybestuur en finansiële rekordhouding, sowel as belasting en boere word oor 'n groot bedieningsgebied bedien.

As gevolg van die toenemende vraag na COMPUTUS se produkte in ander dele van die land, is daar op 15 Junie 2001 besluit om die bestaande struktuur van die beslote korporasie met 'n maatskappy te versterk. Die doel van die maatskappy is om COMPUTUS (die franchiser) se unieke werkswyse en formaat van bestuursinligting deur middel van franchises aan bestaande boekhouers en ouditeure (die franchisees) beskikbaar te stel tot voordeel van hulle boere-kliënte. Dit is COMPUTUS se mikpunt om 20 sulke franchises oor die hele land te vestig.

COMPUTUS wil finansiële bestuursinligting deur middel van 'n franchise-netwerk aan soveel as moontlik boere in Suid-Afrika aanbied. Hierdie inligting bestaan uit makro-ekonomiese inligting wat die ekonomiese omgewing beskryf waarbinne die boer beweeg en ook mikro-ekonomiese inligting wat die boer se eie finansiële posisie weergee. COMPUTUS se beleid is ook om akkurate bestuursinligting tydig aan sy kliënte te voorsien. Rekordhouding word maandeliks op datum gebring terwyl die produksiejaareindstate binne twee maande na die sluitingsdatum van die produksiejaar aan boere afgelewer word.

Verskeie makro-ekonomiese publikasies word gereeld aan boere beskikbaar gestel. Markinligting (pryse en hoeveelhede) en 'n klimaatsverslag (reënval en El-Nino) word weekliks vrygestel terwyl finansiële aanwysers (rentekoerse en wisselkoerse) maandeliks beskikbaar gestel word. Kommentaar op die staatsbegroting, 'n meganisasiekostegids, produksiekoste-begrotings en 'n ekonomiese oorsig oor die landbousektor word op verskeie tydstippe gedurende die jaar gepubliseer.

Die mikro-ekonomiese inligting behels 'n jaarlikse kontantvloeibegroting en die opstel van produksiejaareindstate. Laasgenoemde bestaan uit 'n balans- en inkomstestaat asook 'n ontleding van elke vertakking (bv koring, mielies, skape, beeste) waaruit die boerdery bestaan. Die produksiejaareindstate word ook telkens met 'n streeksgemiddeld en 'n beste en swakste derde vergelyk. Uiteindelik wil COMPUTUS die boer help om die inligting te interpreteer en in sy boerdery te implementeer.